Мюнхеннинг "Бавария" клуби 2025 йилнинг ёзида эркин агентга айланадиган "Байер" ҳимоячиси Жонатан Та трансферига жиддий эътибор қаратмоқда.

Ran.de нашри хабарига кўра, немис гранди 29 ёшли футболчига 4 йиллик шартнома ва йилига 12 миллион евро маош таклиф қилишга тайёр. Шунингдек, мюнхенликлар трансфер суммаси йўқлигини катта миқдордаги - тахминан 15 миллион евролик имзо бонуси билан тўлдиришга тайёр экани айтилмоқда.

Аввалроқ, Та "Барселона"га ўтиш арафасида эди, аммо каталонияликлар молиявий чекловлар туфайли футболчини кейинги мавсумга рўйхатдан ўтказишни кафолатлай олмагани сабабли келишув барбод бўлди.

Ҳимоячига "Бавария"дан қизиқиш янгилик эмас: клуб спорт директори Макс Эберль трансферга ўтган йилнинг ёзида рози бўлган, бироқ ўшанда келишув клуб кузатув кенгаши томонидан блокланган.