Мадриднинг "Реал" клуби ярим ҳимоячиси Лука Модрич мавсум якунида клубни тарк этади.
Аввалроқ "қаймоқранглилар"нинг янги бош мураббийи Хаби Алонсо бўлажак мавсумда хорватиялик футболчига умид қилаётгани, бироқ клубда фахрий билан хайрлашишга қарор қилингани ҳақида хабар берилган эди, деб ёзади Cope. 39 ёшли хавбек тугаётган шартномасини узайтирмоқчи эди, аммо "Реал" раҳбарияти бу борада музокара ўтказишни режалаштирмаяпти.
Тахминларга кўра, шанба куни футболчи Ла Лига сўнгги туридан ўрин олган "Реал Сосьедад"га қарши баҳсда "Сантьяго Бернабеу" мухлислари билан хайрлашади.
Лука Модрич "Реал" сафида 2012 йилдан буён тўп тепиб келмоқда. У Мадрид гранди сафида 590 та ўйин ўтказган.
