Бирлашган Араб Амирликларининг Абу-Даби шаҳрида жиу-житсу буйича ўтказилган "Grand Slam" туркумидаги мусобақаларда Ўзбекистон терма жамоаси аъзолари муваффақиятли иштирок этди.
Жумладан, “Amatures” йўналишида Ўзбекистон терма жамоаси 3 та олтин, 1 та кумуш ва 2 та бронза медалини қўлга киритди.
Мусобақада терма жамоамиз аъзоларидан Раҳим Исмоилов, Николай Журавлев ва Ойбек Қодиров барча рақибларини енгиб, олтин медални қўлга киритган бўлса, Авзал Ахмедов финалга қадар ўтган жангларда муваффақиятли иштирок этди ва кумуш медаль билан тақдирланди. Шунингдек, Имрон Комилов ва Ҳусан Раҳимов ўз вазн тоифаларида терма жамоамиз ҳисобига бронза медалини келтирди.
“Masters” йўналишидаги беллашувларда Аюб Мустаев ва Шаҳзодбек Асқаров шоҳсупанинг энг юқори поғонасидан жой олган бўлса, Руслан Якубов иккинчи ўринни эгаллади. “Professional” таснифида эса Сарвар Раҳмонбердиев бронза медалига эга чиқди.
Ёшлар тоифасидаги "Grand Slam" беллашувларида Амир Гайнуллин чемпионга айланди. Финалга қадар барча рақибларини таслим этган Дилмуҳаммад Нормурзаев кумуш, Сабина Қодирова ҳамда Санжар Раҳмонбердиев эса терма жамоамиз ҳисобига бронза медалини тақдим этди.
