Birlashgan Arab Amirliklarining Abu-Dabi shahrida jiu-jitsu buyicha o‘tkazilgan "Grand Slam" turkumidagi musobaqalarda O‘zbekiston terma jamoasi a’zolari muvaffaqiyatli ishtirok etdi.
Jumladan, “Amatures” yo‘nalishida O‘zbekiston terma jamoasi 3 ta oltin, 1 ta kumush va 2 ta bronza medalini qo‘lga kiritdi.
Musobaqada terma jamoamiz a’zolaridan Rahim Ismoilov, Nikolay Juravlev va Oybek Qodirov barcha raqiblarini yengib, oltin medalni qo‘lga kiritgan bo‘lsa, Avzal Axmedov finalga qadar o‘tgan janglarda muvaffaqiyatli ishtirok etdi va kumush medal bilan taqdirlandi. Shuningdek, Imron Komilov va Husan Rahimov o‘z vazn toifalarida terma jamoamiz hisobiga bronza medalini keltirdi.
“Masters” yo‘nalishidagi bellashuvlarda Ayub Mustayev va Shahzodbek Asqarov shohsupaning eng yuqori pog‘onasidan joy olgan bo‘lsa, Ruslan Yakubov ikkinchi o‘rinni egalladi. “Professional” tasnifida esa Sarvar Rahmonberdiyev bronza medaliga ega chiqdi.
Yoshlar toifasidagi "Grand Slam" bellashuvlarida Amir Gaynullin chempionga aylandi. Finalga qadar barcha raqiblarini taslim etgan Dilmuhammad Normurzayev kumush, Sabina Qodirova hamda Sanjar Rahmonberdiyev esa terma jamoamiz hisobiga bronza medalini taqdim etdi.
