Бугун, 25 май куни Саудия Арабистонининг Ар-Риёд шаҳрида Халқаро оғир атлетика федерацияси (IWF)нинг ҳар тўрт йилда бир марта ўтказиладиган ҳисобот сайлов конгресси кўтаринки руҳда якунланди.

Aҳамиятли жиҳати, янги олимпия даври – 2025-2029 йилларнинг тараққиёт стратегиясини белгилаш мақсадида фаолият олиб борадиган Халқаро оғир атлетика федерацияси Ижроия қўмитасининг 17 нафар аъзолари қаторидан Ўзбекистон Республикаси спорт вазири ўринбосари, мамлакат оғир атлетика федерацияси раисининг биринчи ўринбосари Шахрулло Маҳмудов жой эгаллади.

170 дан зиёд давлатнинг миллий федерация вакиллари иштирокида уч кун давомида ўтган конгресс давомида Муҳаммад Жолуд янги муддатга IWF президенти, АҚШ вакили Хосе Қуинонес бош котиб сифатида иш олиб борадиган бўлди. Конгрессда 2 нафар мустақил вице-президент, 5 та қитъа бўйича IWF вице президент, тегишли йўналишлар бўйича  IWF комиссияси раҳбарлари сайланди.

Делегатларнинг овоз бериши натижасида 17 нафар мутахассис IWF нинг бошқарув органи Ижроия кенгаш аъзолигидан жой олди.

– IWF конгресси ҳар жиҳатдан ишчан руҳда ўтди. Йиғилиш давомида бир неча бор Ўзбекистон номи тилга олинди. Хусусан, Акбар Жўраевнинг 2 та ёзги Олимпия ўйинларида совриндор бўлгани, жаҳон чемпионлигини қўлга киритгани, жаҳон рекордини янгилагани, мамлакатимизда ўтган йиллар давомида оғир атлетика бўйича ташкил этилган жаҳон ва Осиё чемпионатлари энг муваффақиятли халқаро мусобақалар сирасига киритилгани қайд этилди.

Бевосита сайловлар хусусида тўхталадиган бўлсам, IWF нинг юқори органи Ижроия қўмита аъзолари қаторидан биринчи марта ўрин эгаллашимиз жаҳон оғир атлетикасида Ўзбекистоннинг ўрни тобора мустаҳкамланиб бораётганини кўрсатди, – дейди оғир атлетика бўйича Олимпия ўйинлари ғолиби, жаҳон ва қитъа чемпиони Руслан Нуруддинов.

Т.Рўзиев, ЎзА