Bugun, 25 may kuni Saudiya Arabistonining Ar-Riyod shahrida Xalqaro og‘ir atletika federasiyasi (IWF)ning har to‘rt yilda bir marta o‘tkaziladigan hisobot saylov kongressi ko‘tarinki ruhda yakunlandi.

Ahamiyatli jihati, yangi olimpiya davri – 2025-2029 yillarning taraqqiyot strategiyasini belgilash maqsadida faoliyat olib boradigan Xalqaro og‘ir atletika federasiyasi Ijroiya qo‘mitasining 17 nafar a’zolari qatoridan O‘zbekiston Respublikasi sport vaziri o‘rinbosari, mamlakat og‘ir atletika federasiyasi raisining birinchi o‘rinbosari Shaxrullo Mahmudov joy egalladi.

170 dan ziyod davlatning milliy federasiya vakillari ishtirokida uch kun davomida o‘tgan kongress davomida Muhammad Jolud yangi muddatga IWF prezidenti, AQSH vakili Xose Quinones bosh kotib sifatida ish olib boradigan bo‘ldi. Kongressda 2 nafar mustaqil vise-prezident, 5 ta qit’a bo‘yicha IWF vise prezident, tegishli yo‘nalishlar bo‘yicha  IWF komissiyasi rahbarlari saylandi.

Delegatlarning ovoz berishi natijasida 17 nafar mutaxassis IWF ning boshqaruv organi Ijroiya kengash a’zoligidan joy oldi.

– IWF kongressi har jihatdan ishchan ruhda o‘tdi. Yig‘ilish davomida bir necha bor O‘zbekiston nomi tilga olindi. Xususan, Akbar Jo‘rayevning 2 ta yozgi Olimpiya o‘yinlarida sovrindor bo‘lgani, jahon chempionligini qo‘lga kiritgani, jahon rekordini yangilagani, mamlakatimizda o‘tgan yillar davomida og‘ir atletika bo‘yicha tashkil etilgan jahon va Osiyo chempionatlari eng muvaffaqiyatli xalqaro musobaqalar sirasiga kiritilgani qayd etildi.

Bevosita saylovlar xususida to‘xtaladigan bo‘lsam, IWF ning yuqori organi Ijroiya qo‘mita a’zolari qatoridan birinchi marta o‘rin egallashimiz jahon og‘ir atletikasida O‘zbekistonning o‘rni tobora mustahkamlanib borayotganini ko‘rsatdi, – deydi og‘ir atletika bo‘yicha Olimpiya o‘yinlari g‘olibi, jahon va qit’a chempioni Ruslan Nuruddinov.

T.Ro‘ziyev, O‘zA