"Ал-Аҳли" ярим ҳимоячиси Габри Вейга Европа футболига қайтиши мумкин. Инсайдер Экрем Конурнинг маълум қилишича, 23 ёшли испаниялик футболчи "Порту" билан шахсий шартнома шартларини келишиб олган.
Португалия клуби келишувни яқин вақт ичида - 15 июнь куни АҚШда бошланадиган клублар ўртасидаги жаҳон чемпионати бошланишидан олдин расмийлаштирмоқчи. Трансфер қиймати 15-16 млн евро атрофида бўлиши кутилмоқда. "Порту" турнир бошланишидан олдин майдон марказини мустаҳкамлашга умид қилмоқда.
Вейга 2023 йилнинг ёзида "Сельта"дан "Ал-Аҳли"га ўтган ва ўшанда ёш истеъдоднинг Саудия Арабистони чемпионатига кўчиб ўтиши атрофида кўплаб баҳс-мунозараларга сабаб бўлганди. У Саудия Арабистони клуби сафида 44 та ўйинда майдонга тушиб, 8 та гол ва 6 та голли узатмага муаллифлик қилган.
