"Al-Ahli" yarim himoyachisi Gabri Veyga Yevropa futboliga qaytishi mumkin. Insayder Ekrem Konurning ma’lum qilishicha, 23 yoshli ispaniyalik futbolchi "Portu" bilan shaxsiy shartnoma shartlarini kelishib olgan.

Portugaliya klubi kelishuvni yaqin vaqt ichida - 15 iyun kuni AQSHda boshlanadigan klublar o‘rtasidagi jahon chempionati boshlanishidan oldin rasmiylashtirmoqchi. Transfer qiymati 15-16 mln yevro atrofida bo‘lishi kutilmoqda. "Portu" turnir boshlanishidan oldin maydon markazini mustahkamlashga umid qilmoqda.

Veyga 2023 yilning yozida "Selta"dan "Al-Ahli"ga o‘tgan va o‘shanda yosh iste’dodning Saudiya Arabistoni chempionatiga ko‘chib o‘tishi atrofida ko‘plab bahs-munozaralarga sabab bo‘lgandi. U Saudiya Arabistoni klubi safida 44 ta o‘yinda maydonga tushib, 8 ta gol va 6 ta golli uzatmaga mualliflik qilgan.