Таиланднинг Бангкок шаҳрида бокс бўйича "Thailand Open" халқаро турнирида чорак финал баҳслари доирасида Ўзбекистон терма жамоасининг 6 нафар боксчиси рингга кўтарилди.
Чорак финал жангларининг навбатдаги кунида Фарёзбек Дўсматов -55 кг. вазн тоифасида ҳиндистонлик Бартвал Паванни 5:0 ҳисобида мағлуб этиб, ярим финалга чиқди. Фарзона Фозилова вазни -48 кг. бўлган қизлар ўртасидаги беллашувларда индонезиялик Мерлин Томаталага ҳеч қандай имкон қолдирмади ва 1/2 финал иштирокчисига айланди.
Шунингдек, ўз вазн тоифаларида Феруза Казакова, Шодиёржон Мелиқўзиев ва Самандар Жалолов каби чарм қўлқоп усталаримиз 1/4 финал босқичидан муваффақиятли ўтди. Афсуски, Саят Илясов мусобақадаги иштирокини чорак финалда якунлади.
Эслатиб ўтамиз, "Thailand Open" халқаро турнирида бундан аввал яна тўрт нафар боксчимиз ярим финал босқичига йўлланмани қўлга киритган эди.
Бугун ҳам чорак финал баҳслари давом этади. Кун давомидаги жангларда 6 нафар боксчиларимиз ярим финал учун рингга кўтарилади.
Жуфтликлар билан танишинг:
-85 кг: Нусрат Тоҳиров – Ҳуссеин Иашаш (Иордания)
-51 кг: Сабина Бобоқулова – Мун Гаеон (Жанубий Корея)
-70 кг: Ойша Тоирова – Анастасиа Черноколенко (Украина)
-75 кг: Жавоҳир Абдураҳимов – Тимур Нурсеитов (Қозоғистон)
-57 кг: Нигина Ўктамова – Ге Яқи (Хитой)
-75 кг: Азиза Зокирова – Жу Яшу (Хитой).
