Жорий йилнинг 28-31 май кунлари Нукус шаҳрида белбоғли кураш бўйича ўғил болалар ҳамда қизлар ўртасида жаҳон ва Осиё чемпионати баҳслари бўлиб ўтади.

Нуфузли мусобақа олдидан оммавий ахборот воситалари вакиллари иштирокида матбуот анжумани ўтказилди.

Унда халқаро белбоғли кураш федерацияси Президенти Хабир Ҳабибуллин, Осиё белбоғли кураш конфедерацияси президенти Мўмин Муротов, Ўзбекистон белбоғли кураш федерацияси раиси Равшан Дастиров, ёшлар миллий терма жамоаси бош мураббийи Бахтиёр Турғунпўлатов, Қорақалпоғистон Республикаси спорт вазири Эркинбой Қутибоевлар мусобақага тайёргарлик ишлари, ўтказилиш тартиби ҳамда иштирокчилар тўғрисида батафсил маълумот беришди.

Таъкидланганидек, Ўзбекистон Республикаси Президенти соврини учун ўғил болалар ва қизлар ўртасида белбоғли кураш бўйича жаҳон ва Осиё чемпионати Ўзбекистон Республикаси спорт вазирлиги, Қорақалпоғистон Республикаси Жўқорғи Кенгеси, Осиё белбоғли кураш конфедерацияси, Ўзбекистон белбоғли кураш федерацияси ҳамда қатор вазирлик ва ташкилотлар ҳамкорлигида ўтказилмоқда.

Нукус шаҳридаги 1- сонли спорт мактабида илк бор ўтказиладиган ушбу жаҳон ва Осиё чемпионатида Ҳиндистон, Россия, Туркия, Грузия, Индонизия, Арманистон, Венгрия, Швецария, Япония, Қозоғистон, Қирғизистон, Тожикистон ва Туркманистон каби 25 га яқин давлатнинг номдор полвонлари иштирок этиши кутилмоқда.

Белбоғли кураш бўйича 29 майда ўтказиладиган жаҳон чемпионатида ўғил болалар эркин йўналишда -45, -50, -55, -60, -65, -71, -77, -85, -95 ҳамда +95 кг. вазн тоифаларида куч синашишса, қизлар -44, -48, -52, -57, -63, -70, +70 кг. вазнларда беллашишади.

Шунингдек, регламентга мувофиқ, 30 май куни белбоғли кураш бўйича Осиё чемпионати ўтказилади. Мазкур чемпионатда ўғил болалар -45, -50, -55, -60, -65, -71, -77, -85, -95, +95 кг. вазн тоифаларида кураш тушса, қизлар -44, -48, -52, -57, -63, -70, +70 кг. вазн тоифаларида ўзаро беллашишади.

Тадбир якунида оммавий ахборот воситалари вакиллари ўзларини қизиқтирган саволларига жавоб олишди.