"Монтеррей" марказий ҳимоячиси, ўтмишда Мадриднинг "Реал" клубида тўп тепган Серхио Рамос "Барселона" вингери Ламин Ямал ҳақида фикр билдирди.
17 ёшли футболчи аллақачон "кўк-анорранглилар," Испания терма жамоаси ва бутун жаҳон футболининг асосий юлдузларидан бири сифатида танилган.
"Мен учун Ямал келажак эмас, балки ҳозирги кун. Футболчилик фаолияти узоқ йўл, аммо Ламин рекордларни янгилашда давом этмоқда, унинг ёшидаги одам учун ғайриоддий ишлар қилмоқда. У ёрқин, индивидуал иқтидорга эга футболчи ва "Барса"да ўйнашига қарамай, унга энг яхши тилакларни билдираман. Ахир у мамлакатимиз, миллатимизнинг вакили-ку. У терма жамоамиз учун жуда муҳим," - деди Рамос матбуот анжуманида.
Ўтган мавсумда Ламин Ямал "Барселона"га Ла Лига ва Испания Кубогини ютишда ёрдам берди.
