"Барселона" Жоан Гарсия билан шартнома имзолаганини расман эълон қилган бир пайтда, Мадридда жамоанинг аллақачон клуб юлдузлари мақомини олган амалдаги футболчилари билан ҳамкорликни давом эттириш устида иш олиб борилмоқда.
Diario AS нашри манбаларига кўра, Мадриднинг "Реал" клуби Тибо Куртуага шартномани 2028 йилгача узайтиришни таклиф қилишга қарор қилган. "Қаймоқранглилар"нинг асосий дарвозабони бутун ўн йилликни қироллик клубида ўтказиши мумкин.
Куртуанинг "Реал" билан амалдаги шартномаси 2026 йилнинг июнь ойи охиригача мўлжалланган, шунинг учун кейинги мавсум унинг учун охиргиси бўлиши керак эди, аммо клуб раҳбарияти 33 ёшли жаҳон даражасидаги дарвозабоннинг "Сантьяго Бернабеу"да қолишини хоҳламоқда.
Эслатиб ўтамиз, Куртуа "Реал" сафига 2018 йилнинг ёзида "Челси"дан 35 миллион евро эвазига келиб қўшилган эди. Бу вақт ичида бельгиялик "қироллик клуби" сафида 282 та ўйинда майдонга тушиб, 14 та кубок, жумладан, иккита Чемпионлар лигаси совринини қўлга киритган.
