"Barselona" Joan Garsiya bilan shartnoma imzolaganini rasman e’lon qilgan bir paytda, Madridda jamoaning allaqachon klub yulduzlari maqomini olgan amaldagi futbolchilari bilan hamkorlikni davom ettirish ustida ish olib borilmoqda.

Diario AS nashri manbalariga ko‘ra, Madridning "Real" klubi Tibo Kurtuaga shartnomani 2028 yilgacha uzaytirishni taklif qilishga qaror qilgan. "Qaymoqranglilar"ning asosiy darvozaboni butun o‘n yillikni qirollik klubida o‘tkazishi mumkin.

Kurtuaning "Real" bilan amaldagi shartnomasi 2026 yilning iyun oyi oxirigacha mo‘ljallangan, shuning uchun keyingi mavsum uning uchun oxirgisi bo‘lishi kerak edi, ammo klub rahbariyati 33 yoshli jahon darajasidagi darvozabonning "Santyago Bernabeu"da qolishini xohlamoqda.

Eslatib o‘tamiz, Kurtua "Real" safiga 2018 yilning yozida "Chelsi"dan 35 million yevro evaziga kelib qo‘shilgan edi. Bu vaqt ichida belgiyalik "qirollik klubi" safida 282 ta o‘yinda maydonga tushib, 14 ta kubok, jumladan, ikkita Chempionlar ligasi sovrinini qo‘lga kiritgan.