Лондоннинг «Челси» жамоаси АҚШда ўтаётган Клублар ўртасидаги жаҳон чемпионати 1/8 финал босқичида Лиссабоннинг «Бенфика» клубини йирик ҳисобда мағлуб этди. Учрашув Шарлотт (Шимолий Каролина) шаҳридаги «Банк оф Америка» стадионида бўлиб ўтди ва «Челси»нинг 4:1 ҳисобидаги ғалабаси билан якунланди.

64-дақиқада «Челси» жамоаси Рис Жеймснинг жарима зарбасидан урилган голи билан ҳисобни очди. «Бенфика» 90+5-дақиқада ҳисобни тенглаштиришга муваффақ бўлди — Анхель Ди Мария пенальтини аниқ амалга оширди.

Қўшимча вақтда эса лондонликлар тўлиқ устунлик қилиб, учта гол урди. Бу голларга Кристофер Нкунку, Педру Нету ва Кирман Дьюсбери-Холл муаллифлик қилди.

Қайд этиш жоизки, «Бенфика» 92-дақиқадан бошлаб майдонда бир нафар кам футболчи билан ҳаракат қилди — Жанлука Престианни қизил карточка олди.

87-дақиқада учрашув об-ҳаво сабаб тўхтатилди.

1/4 финалда Энцо Мареска бошчилигидаги «Челси» Бразилиянинг «Палмейрас» жамоасига қарши ўйнайди. Бунгача «Палмейрас» «Ботафого»ни 1:0 ҳисобида (қўшимча вақтда) мағлуб этган эди.

Гуруҳ босқичида «Бенфика» С гуруҳида иштирок этди ва 7 очко тўплаб, биринчи ўринни эгаллади. «Челси» эса D гуруҳида 6 очко билан иккинчи ўринни эгаллади.

Клублар ўртасидаги жаҳон чемпионати. 1/8 финал
Бенфика (Лиссабон, Португалия) — Челси (Лондон, Англия) — 1:4 (Асосий вақт — 1:1, қўшимча бўлимлар — 0:3)
Голлар: 0:1 – Рис Жеймс (64')
1:1 – Анхель Ди Мария (90+5', пенальти)
1:2 – Кристофер Нкунку (108')
1:3 – Педру Нету (115')
1:4 – Кирман Дьюсбери-Холл (117')
Қизил карточка: Жанлука Престианни («Бенфика») — 92'