"Ювентус" ўтган мавсумнинг иккинчи қисмини ижара асосида Туринда ўтказган "ПСЖ" ҳужумчиси Рандал Коло-Муанини қайтаришга қизиқиш билдирмоқда. Футболчи КЎЖЧда жамоага ёрдам бера олиши учун ижара муддати ҳатто узайтирилганди.
CalcioMercato хабарига кўра, ижара муддатини узайтириш вақтида томонлар Коло Муани келажаги бўйича музокараларга янги мавсумни нишонга олган ҳолда қайтишга келишиб олишган. Париж клуби икки вариантни кўриб чиқмоқда: ё ёзда футболчини тахминан 45 миллион еврога сотиш ёки 2025/26 йилги мавсумдан кейин сотиб олиш шарти билан ижарага бериш.
Шу билан бирга, "Ювентус"га ҳужумчи учун рақобат жиддий экани айтилди. Коло-Муанига даъвогарлар орасида "Челси" ва "Арсенал" бор.
Эслатиб ўтамиз, Коло-Муани 2024/25 йилги мавсумда "Ювентус" сафида 22 та ўйинда майдонга тушиб, 10 та гол ва 3 та голли узатмага муаллифлик қилган.
