"Реал" "Аякс"нинг 16 ёшли марокашлик иқтидори Абделла Оуазанни ўз сафига қўшиб олишга яқин эди, бироқ кутилмаганда келишув барбод бўлиш хавфи остида қолди. Diario AS хабарига кўра, мадридликлар тиббий кўрикдан ўтиб, барча ҳужжатлар тайёр бўлганига қарамай, трансферни сўнгги босқичда тўхтатган.
Оуазан душанба куни Испания пойтахтига етиб келди ва "Реал" билан уч йиллик шартнома имзолаши, шундан сўнг Альваро Арбелоа қўл остида "Кастилья"га ўтиши керак эди. Аммо ҳозирча мадридликлар унга расмий шартнома имзолашни таклиф қилгани йўқ.
Манбага кўра, тиббий кўрик пайтида баъзи муаммолар юзага келган бўлиши мумкин, шунинг учун клуб якуний қарорни кейинга қолдирган. Агар шартнома имзоланмаса, ўйинчининг вакиллари муқобил вариантларни излай бошлайди. Унга "Барселона" ва "ПСЖ" қизиқиш билдираётган эди.
Ярим ҳимоячи Африка U-17 кубогида Марокаш ёшлар терма жамоасининг етакчиларидан бири бўлган, шундан сўнг у "Реал"нинг қизиқишини уйғотган. Уазан "Аякс" академиясининг энг истиқболли тарбияланувчиларидан бири ҳисобланади, у билан шартнома аллақачон тугаган.
