2023 йилда "Манчестер Сити"ни тарк этиб, "Ал-Аҳли" сафига ўтган вингер Риёд Маҳрез аввалроқ Саудия Арабистони Профессионал Лигаси Франция 1-лигасидан кучлироқ эканини айтган Криштиану Роналдунинг гапига изоҳ берди.
"Мен унинг фикрига қўшилмайман. Ишонаманки, айни дамда Европанинг энг кучли бешта лигаси биздан олдинда, Саудия лигаси эса уларнинг ортида турибди. Менимча, биз аллақачон уларнинг даражасига яқинлашиб қолганмиз. Ишончим комилки, келажакда бизнинг лигамиз дунёнинг энг яхшиларидан бирига айланиши мумкин. Менга ўхшаган футболчилар биринчи бўлиб шу йўлни танладилар ва чемпионат ривожига ёрдам беришмоқда. Бу ерда бўлган икки мавсумда мен жамоалар, мураббийлар, тактика ва ташкилот савиясидаги ўсишларни кўрдим. Улар бу лигани кучли қилиш учун жиддий саъй-ҳаракатлар ва чин дилдан интилишмоқда ва муваффақиятга эришадилар", - деди Маҳрез L'Equipe нашрига.
Қўшимча қиламизки, 33 ёшли Маҳрезнинг "Ал-Аҳли" билан амалдаги шартномаси 2027 йилнинг июнигача мўлжалланган.
