2023 yilda "Manchester Siti"ni tark etib, "Al-Ahli" safiga o‘tgan vinger Riyod Mahrez avvalroq Saudiya Arabistoni Professional Ligasi Fransiya 1-ligasidan kuchliroq ekanini aytgan Krishtianu Ronalduning gapiga izoh berdi.

"Men uning fikriga qo‘shilmayman. Ishonamanki, ayni damda Yevropaning eng kuchli beshta ligasi bizdan oldinda, Saudiya ligasi esa ularning ortida turibdi. Menimcha, biz allaqachon ularning darajasiga yaqinlashib qolganmiz. Ishonchim komilki, kelajakda bizning ligamiz dunyoning eng yaxshilaridan biriga aylanishi mumkin. Menga o‘xshagan futbolchilar birinchi bo‘lib shu yo‘lni tanladilar va chempionat rivojiga yordam berishmoqda. Bu yerda bo‘lgan ikki mavsumda men jamoalar, murabbiylar, taktika va tashkilot saviyasidagi o‘sishlarni ko‘rdim. Ular bu ligani kuchli qilish uchun jiddiy sa’y-harakatlar va chin dildan intilishmoqda va muvaffaqiyatga erishadilar", - dedi Mahrez L'Equipe nashriga.

Qo‘shimcha qilamizki, 33 yoshli Mahrezning "Al-Ahli" bilan amaldagi shartnomasi 2027 yilning iyunigacha mo‘ljallangan.