Мадриднинг “Реал” клуби ва бразилиялик ҳужумчи Винисиус Жуниор ўртасидаги музокаралар тўхтаб қолган. Футболчи “қаймоқранглилар” сафида энг юқори маош олувчи ўйинчига айланишни истамоқда, аммо клуб раҳбарияти бу талабни қондиришга тайёр эмас.

Испаниянинг "Fichajes" нашри хабарига кўра, Винисиус Саудия Арабистони чемпионатидан бўлаётган қизиқишлардан яхши хабардор. У “Реал” раҳбариятига: “агар мен истаган маошни бермасангиз, Саудия чемпионатига ўтаман”, деган шарт қўйган.

Маълумотларга кўра, 2024 йил охирида Саудия клублари Винисиуснинг трансфери учун “Реал”га 300 миллион евро таклиф қилган, футболчининг ўзига эса йилига 200 миллион евро маош беришга тайёр эканлигини билдирган. Бу таклиф яқин кунларга қадар ўз кучидан бўлган, бироқ ҳозир саудияликлар Винисиусни сотиб олиш фикридан қайтган. Cadena SER нашрига кўра, Саудия клублари бу йил янги футболчиларни харид қилиш учун ажратиладиган сармояни кескин қисқартирган. Бу ҳолат стратегик сабабларга, жумладан, кўплаб футболчиларнинг 2026 йилги Жаҳон чемпионати олдидан кучлироқ чемпионатларда ўйнаш истаги билан боғлиқ.

"El Larguero" нашри эса Саудия клубларининг молиявий эҳтиёткорлигини “асосий эътибор юлдузларни харид қилишга эмас, балки мавжуд лойиҳаларни давом эттиришга қаратилган” дея изоҳлаган.

Юзага келган вазият Винисиусни қийин аҳволда қолдирган. Эндиликда у яқин орада Саудия чемпионатига йўл ола олмайди. Бу эса “Реал” фойдасига хизмат қилиши ва футболчи клуб талабларига кўнишга мажбур бўлиши мумкинлиги таъкидланмоқда.