Madridning “Real” klubi va braziliyalik hujumchi Vinisius Junior o‘rtasidagi muzokaralar to‘xtab qolgan. Futbolchi “qaymoqranglilar” safida eng yuqori maosh oluvchi o‘yinchiga aylanishni istamoqda, ammo klub rahbariyati bu talabni qondirishga tayyor emas.

Ispaniyaning "Fichajes" nashri xabariga ko‘ra, Vinisius Saudiya Arabistoni chempionatidan bo‘layotgan qiziqishlardan yaxshi xabardor. U “Real” rahbariyatiga: “agar men istagan maoshni bermasangiz, Saudiya chempionatiga o‘taman”, degan shart qo‘ygan.

Ma’lumotlarga ko‘ra, 2024 yil oxirida Saudiya klublari Vinisiusning transferi uchun “Real”ga 300 million yevro taklif qilgan, futbolchining o‘ziga esa yiliga 200 million yevro maosh berishga tayyor ekanligini bildirgan. Bu taklif yaqin kunlarga qadar o‘z kuchidan bo‘lgan, biroq hozir saudiyaliklar Vinisiusni sotib olish fikridan qaytgan. Cadena SER nashriga ko‘ra, Saudiya klublari bu yil yangi futbolchilarni xarid qilish uchun ajratiladigan sarmoyani keskin qisqartirgan. Bu holat strategik sabablarga, jumladan, ko‘plab futbolchilarning 2026 yilgi Jahon chempionati oldidan kuchliroq chempionatlarda o‘ynash istagi bilan bog‘liq.

"El Larguero" nashri esa Saudiya klublarining moliyaviy ehtiyotkorligini “asosiy e’tibor yulduzlarni xarid qilishga emas, balki mavjud loyihalarni davom ettirishga qaratilgan” deya izohlagan.

Yuzaga kelgan vaziyat Vinisiusni qiyin ahvolda qoldirgan. Endilikda u yaqin orada Saudiya chempionatiga yo‘l ola olmaydi. Bu esa “Real” foydasiga xizmat qilishi va futbolchi klub talablariga ko‘nishga majbur bo‘lishi mumkinligi ta’kidlanmoqda.