Мадриднинг "Реал" клуби марказий ҳимоячиси Эдер Милитао янги мавсум старти олдидан жамоанинг тайёргарлигига баҳо берди.
Сешанба куни "қаймоқранглилар" Австриянинг "Тирол" клуби билан ўртоқлик учрашувида йирик ҳисобда ғалаба қозонди (4:0) - бу расмий ўйинлар олдидан сўнгги назорат ўйини. Эслатиб ўтамиз, 19 август куни мадридликлар Ла Лига янги ўйинининг 1-турида "Осасуна"га қарши баҳс олиб боради.
"Мавсумолди жараёнлари осон кечмади, аммо биз чемпионат стартига тайёрмиз. Жамоа ўйинга яхши формада етиб боради. Биз ўзимизга ишонамиз ва бутун диққат-эътиборимизни жамлаганмиз. Олдинда узоқ мавсум бор ва биз бунга тайёрмиз," - дея оғир жароҳатдан сўнг сафга қайтган Милитаонинг сўзларини келтиради Madrid Zone.
