"Барселона"нинг собиқ марказий ҳимоячиси, яқинда "Ан-Наср"га ўтган Иньиго Мартинес трансфер сабаблари ҳақида гапирди.
34 ёшли футболчи "кўк-анорранглилар" билан ўзаро келишувга кўра шартномани бекор қилган, кейин эса саудияликлар билан шартнома имзолаган.
"Мен йиғин тугагач, Флик билан гаплашдим. У мени тушунишини билардим ва у билан ростгўй эдим. Ёшим 34 да, шартномам якунига атиги бир йил қолганди.
Гап "Барселона"да кам пул топганимда эмас. Менинг маошим анча юқори эди, оилам ҳам ўзини қулай ҳис қиларди. Аммо бундай имкониятлар камдан-кам учрайди - "йўқ" дейиш қийин. Флик ҳайрон бўлди, лекин ҳаммасини тушунди. Бу ёқимли суҳбат бўлди, лекин мен учун қайғули эди, чунки мен мураббий ва клуб билан хайрлашишни хоҳламадим," - дея Мартинеснинг сўзларини келтиради Managing Barca.
Испаниялик футболчи "Барселона"да икки мавсум ҳаракат қилди.
