Миланнинг "Интер" клуби ҳужумчиси Меҳди Тареми фаолиятини Грецияда давом эттириши мумкин. "Нерадзуррилар" 33 ёшли футболчига умид қилмаяпти, шунинг учун трансфер ойнаси ёпилгунга қадар уни сотиб юборишни режалаштирмоқда. Журналист Маттео Мореттонинг маълум қилишича, Италия гранди "Олимпиакос"нинг Тареми бўйича таклифига аллақачон рози бўлган. Энди барчаси ҳужумчининг ўзига боғлиқ: агар у ижобий жавоб берса, трансфер амалга ошади.
Меҳди Тареми "Интер"да бир мавсум ўтказди. Эронлик футболчи барча мусобақаларда миланликлар жамоаси сафида 43 та ўйинда майдонга тушиб, 3 та гол урган ва 9 та голли узатмани амалга оширган.
"Олимпиакос" Греция чемпионатининг ўтган мавсумида ғолиб бўлди. Жамоа бугун қуръа ташланадиган Чемпионлар лигасининг умумий босқичида иштирок этади.
