"Марсель" билан ўйин қолдирилиши "ПСЖ"нинг "Олтин тўп" учун режаларини ўзгартириб юборди.
Якшанба куни "Велодром"да бўлиб ўтиши керак бўлган Лига 1 5-тур учрашуви ноқулай об-ҳаво шароити туфайли қолдирилди. Учрашув бугун, 22 сентябрь куни Тошкент вақти билан соат 23:00да - "Олтин тўп"ни топшириш маросими вақтида бўлиб ўтади.
L’Equipe хабарига кўра, "ПСЖ"дан маросимга 40 га яқин киши келади - бу ўйин қолдирилишидан олдин режалаштирилганидан 20 кишига кам. Парижликлар устози Луис Энрике тадбирни ўтказиб юбориши аниқ, бу ҳақда у олдиндан маълум қилганди.
Ҳозирча маросимда "ПСЖ" президенти Носир Ал-Ҳелайфий иштирок этиши ёки этмаслиги номаълум.
"ПСЖ" футболчиларидан Усмон Дембеле, Дезире Дуэ ва Жоау Невеш иштирок этиши аниқ. Уларнинг барчаси яқинлари ҳамроҳлигида бўлади.
Маросимда Дембеле билан бирга унинг оиласи, агенти Мусса Сиссоко ва баъзи дўстлари ҳам иштирок этиши кутилмоқда. Дастлаб Дембелега 30 га яқин киши ҳамроҳлик қилиши режалаштирилган эди, аммо маросимда ҳамма ҳам бевосита иштирок эта олмайди.
