Элит Чемпионлар лигаси 2-турида "Насаф" "Ал-Ҳилол"ни қабул қилди ва 2:3 ҳисобида мағлуб бўлди.

21-дақиқада Сергей Милинкович-Савич Абдувоҳид Неъматовнинг қўпол хатосидан сўнг ҳисобни очди. 26-дақиқада Сардор Баҳромов даҳшатли зарбаси билан мувозанатни тиклади. 45+2-дақиқада Тео Эрнандес "аждарлар"нинг 6 нафар футболчисини алдаб ўтиб, гол урди ва яна Саудия клубини олдинга олиб чиқди. 60-дақиқада Жавоҳир Сидиқов Умар Эшмуродовнинг ажойиб узатмасидан сўнг дарвозабон билан яккама-якка вазиятга чиқиб борди ва Яссин Бунунинг оёқлари орасидан гол урди. 79-дақиқада Маркос Леонардо Милинкович-Савичнинг узатмасидан сўнг тўпни Неъматовнинг устидан тушириб қўйди ва жамоасига 3 очко келтирган гол муаллифи бўлди.

"Ал-Ҳилол" 6 очко билан турнир жадвалида пешқадамликни қўлга олди. "Насаф" сўнгги ўринда (0 очко).

Элит ОЧЛ, 2-тур
29.09.2025, душанба, 18:45
Насаф - Ал-Ҳилол - 2:3
Голлар: 0:1 – 21, Сергей Милинкович-Савич, 1:1 – 27, Сардор Баҳромов (Умарбек Эшмуродов), 1:2 – 45+2, Тео Эрнандес (Али Ал Булайҳи), 2:2 – 60, Жавоҳир Сидиқов (Умарбек Эшмуродов), 2:3 – 79, Маркос Алмейда (Сергей Милинкович-Савич)
Насаф: Абдувоҳид Неъматов, Ғолиб Ғайбуллаев, Зафармурод Абдираҳматов (Суҳроб Нуруллоев, 67), Шароф Муҳитдинов (Драган Черан, 46), Ҳусайн Норчаев, Игорь Голбан (Жавоҳир Сидиқов, 46 (Жавоҳир Убайдуллаев, 73), Сардорбек Баҳромов, Шуҳрат Муҳаммадиев, Шерзод Насруллаев, Ойбек Бозоров, Умарбек Эшмуродов
Ал-Ҳилол: Яссин Буну, Калиду Кулибали, Али Ал Булайҳи (Кайо Сезар Лима, 72), Рубен Невеш, Маркос Алмейда (Абдуллаҳ Радиф, 90+1), Тео Эрнандес, Сергей Милинкович-Савич, Муҳаммад Канно (Нассер Ал Давсари, 85), Ҳасан Ал Тамбакти, Ҳамад Ал Туҳайфан, Абдуллоҳ Ал Ҳамддан (Муҳаммад Ал Ями, 85)