Мадриднинг "Реал" клуби футболчиси Винисиус Жуниор Ла Лига доирасидаги "Вильярреал"га (3:1) қарши ўйин якунлангач, журналистлар билан суҳбатлашди.
Бразилиялик футболчи дубль қайд этиб, учрашув қаҳрамонига айланди. Айнан 25 ёшли вингер якунда беллашувнинг энг яхши футболчиси совринини қўлга киритди.
"Мен "Бернабеу"да ғалаба қозона олганимиздан жуда хурсандман. Мухлисларимиз биз учун ҳамма нарсани англатади. Ўйлайманки, бугун ажойиб ўйин кўрсатдим, шу руҳда давом этиш керак. Халқаро паузадан сўнг, бизни муҳим ўйинлар кутмоқда. Умид қиламанки, ҳеч ким жароҳатланиб қайтмайди. Олдинда узоқ мавсум бор," - деди Винисиус ОАВ билан суҳбатда.
"Реал" 8 турдан кейин очколарини 21 тага етказиб, пешқадамликка қайтди, аммо "Барселона" (19) ҳисобида битта захира ўйини бор.
