"Милан" Майк Меньян ўрнига дарвозабон қидирмоқда - "россонерилар"нинг француз посбони тез орада шартномани узайтириш билан боғлиқ муаммолар туфайли клубни тарк этиши мумкин. La Gazzetta dello Sport нашрига маълум бўлишича, Милан шаҳри клуби эътиборига икки дарвозабон тушган.
Манбага кўра, "Милан" раҳбарияти икки дарвозабонга қизиқиш билдирмоқда - "Парма"дан Дзион Судзуки ва Германиянинг "Фрайбург" клубидан Ноа Атуболу. 2026 йилда "россонерилар" улардан бирини қўлга киритиш устида фаол иш бошлаши мумкин.
Дзион Судзуки жорий мавсумда "Парма" сафида барча мусобақаларда 8 та ўйинда майдонга тушиб, 9 та гол ўтказиб юборди. Япониялик футболчининг Италия клуби билан шартномаси 4 йилдан сўнг якунига етади.
Ноа Атуболу "Фрайбург" учун тўққизта ўйин ўтказди, шундан учтасида ўз дарвозаси дахлсизлигини сақлаб қолди. Германиялик дарвозабон 11 та гол ўтказиб юборди.
