Неймарнинг «Сантос» клубидаги келажаги ноаниқ бўлиб қолди — жамоа футболчи билан шартномани узайтириш бўйича музокараларни тўхтатди.
ESPN маълумотларига кўра, клуб раҳбарияти 33 ёшли футболчи билан шартномани узайтириш бўйича музокараларни вақтинча тўхтатган. Неймарнинг амалдаги шартномаси 2025 йилнинг охиригача мўлжалланган.
Манбаларга кўра, бу қарор икки асосий омилга боғлиқ: футболчининг соғлиғи ва унинг юқори маоши. «Сантос» раҳбарияти Неймар жароҳатидан тўлиқ тикланмагунча шартномани узайтиришни маъқул деб ҳисобламайди. Шу билан бирга, клуб футболчининг тўлиқ формага қайтишини кутмоқчи ва шундан сўнг музокараларни қайта бошлаш ниятида.
Таъкидланишича, тарафлар ўртасида ҳеч қандай можаро йўқ — музокаралар ўзаро келишув асосида тўхтатилган. Неймарнинг клубга қайтиши «Сантос»га тижорат фаолияти ва атрибутика савдоси орқали катта даромад келтирганига қарамай, унинг жорий маоши клуб учун жиддий молиявий юк бўлиб қолмоқда.
Клуб раҳбарияти таъкидлаганидек, Неймар билан келгусидаги ҳамкорлик унинг соғлиги ва олдинги даражада ўйнай олиш қобилиятига боғлиқ бўлади.













