"Бавария" жорий мавсум давомида чап қанот ҳимоячиси Рафаэль Геррейру билан хайрлашмоқчи эмас.
31 ёшли футболчи камдан-кам ҳолларда мюнхенликлар сафида асосий таркибда майдонга тушади, шу боис ОАВда унинг кетиши ҳақида гап-сўзлар юрибди. Журналист Флориан Плеттенберг хабарига кўра, "Бавария" Геррейруни январда сотмоқчи эмас. Клубдагилар футболчининг универсаллигини қадрлашади ва уни камида мавсум охиригача сақлаб қолишни исташади. Мураббий Венсан Компани португалияликни жуда қадрлайди.
Рафаэль Геррейру жорий мавсумда "Бавария"нинг еттита учрашувида қатнашиб, биттадан гол ва ассист қайд этди. Ярим ҳимояда ўйнай оладиган қанот ҳимоячисининг шартномаси келаси йилнинг июнь ойида ўз ниҳоясига етади.
