21 ва 22 октябрь кунлари УЕФА Чемпионлар лигаси 2025/2026 йилги мавсуми умумий босқичининг 3-турига доир 18 та ўйин бўлиб ўтди. Ушбу баҳсларда жамоалар жами 71 та гол урди.

УЕФА матбуот хизмати хабарига кўра, бу кўрсаткич турнир тарихидаги энг юқори самарадорлик рекорди ҳисобланади. Илгариги рекорд — 18 та ўйинда 67 та гол — турнир тарихи давомида икки марта қайд этилган: жорий мавсумнинг 1-турида ҳамда ўтган мавсум Чемпионлар лигасининг 5-турида.

Эслатиб ўтамиз, 21 октябрь куни 3-турнинг дастлабки тўққиз ўйинида 43 та гол урилган бўлса, иккинчи ўйин куни жамоалар 28 марта ғалаба тўпини киритишди. Шундай қилиб, Чемпионлар лигаси тарихида илк бор бир тур доирасида 70 тадан ортиқ гол урилди.

Ҳозирги вақтда турнир жадвалида 9 очко тўплаган ПСЖ пешқадамлик қилмоқда. 9 очкога эга «Бавария» иккинчи ўринда жойлашган. Учинчи, тўртинчи ва бешинчи ўринларда эса бир хил очкога эга «Интер», «Арсенал» ва «Реал» жамоалари жой олган.