21 va 22 oktyabr kunlari UYEFA Chempionlar ligasi 2025/2026 yilgi mavsumi umumiy bosqichining 3-turiga doir 18 ta o‘yin bo‘lib o‘tdi. Ushbu bahslarda jamoalar jami 71 ta gol urdi.

UEFA matbuot xizmati xabariga ko‘ra, bu ko‘rsatkich turnir tarixidagi eng yuqori samaradorlik rekordi hisoblanadi. Ilgarigi rekord — 18 ta o‘yinda 67 ta gol — turnir tarixi davomida ikki marta qayd etilgan: joriy mavsumning 1-turida hamda o‘tgan mavsum Chempionlar ligasining 5-turida.

Eslatib o‘tamiz, 21 oktyabr kuni 3-turning dastlabki to‘qqiz o‘yinida 43 ta gol urilgan bo‘lsa, ikkinchi o‘yin kuni jamoalar 28 marta g‘alaba to‘pini kiritishdi. Shunday qilib, Chempionlar ligasi tarixida ilk bor bir tur doirasida 70 tadan ortiq gol urildi.

Hozirgi vaqtda turnir jadvalida 9 ochko to‘plagan PSJ peshqadamlik qilmoqda. 9 ochkoga ega «Bavariya» ikkinchi o‘rinda joylashgan. Uchinchi, to‘rtinchi va beshinchi o‘rinlarda esa bir xil ochkoga ega «Inter», «Arsenal» va «Real» jamoalari joy olgan.