Англиянинг «Борнмут» клуби бош мураббийи Андони Ираола жамоа билан шартномани узайтириш эҳтимоли ҳақидаги маълумот билан ўртоқлашди. Унинг амалдаги келишуви 2026 йил ёзида якунланади.
Ираоланинг айтишича, бу масала клуб эгаси Билл Фоули билан ҳали батафсил муҳокама қилинмаган. Фоули ўтган ҳафта Британияга ташриф буюриб, жамоа машғулотларини кузатган эди.
«Ҳа, биз биргаликда тушлик қилдик. У машғулотларимизни кўриш учун келганди. Энди бу ерда йиғилишимиз мумкин бўлган жойимиз бор, ва биз шунчаки суҳбатлашдик. Турли мавзулар ҳақида гаплашдик, лекин шартнома ҳақида эмас», — деб Ираоланинг сўзларини Tribalfootball келтирди.
«Шартнома ҳақида тўлиқ учрашув бўлгани йўқ. Йўқ, ҳали бу масалада гаплашишга вақт бор, қачон қарор қабул қилсак, ўшанда муҳокама қиламиз».
Ҳозирда «Борнмут» АПЛ жадвалида 18 очко билан иккинчи ўринни эгаллаб турибди. 2 ноябрь куни соат 21:30 (Тошкент вақти)да уларнинг «Манчестер Сити»га қарши учрашуви бошланади.
