"Тоттенхэм" "Реал Сосьедад" ҳужумкор ярим ҳимоячиси Такефуса Кубога даъвогарлик қилмоқда. 24 ёшли футболчининг трансфери "шпорлар"га 60 млн еврога тушиши мумкин. Defensa Central нашрининг таъкидлашича, агар трансфер амалга ошса, Мадриднинг "Реал" клуби 30 млн евро ишлаб олади. "Қироллик клуби" 2022 йилда япониялик футболчини сотар экан, келгусида футболчини қайта сотишнинг 50 фоизини келишувга қўшган эди.
Такефуса Кубо жорий мавсум "Реал Сосьедад" сафида 10 та ўйинда майдонга тушди ва 1 та гол уришга эришди. Илгари баск клуби юлдузига Лондоннинг "Арсенал", "Эвертон", "Атлетико", "Милан" ва бошқа клублар қизиқиш билдирган эди.
