Туркияда йирик пул тикиш можароси бўйича тергов давом этмоқда.
Турли дивизионлардаги 1000 дан ортиқ футболчи гаровда иштирок этгани учун четлатилди. Улардан 27 нафари Суперлига клубларида тўп тепади.
Туркиянинг Milliyet нашри хабарига кўра, четлатилганлар рўйхатида "Галатасарой", "Бешиктош", "Трабзонспор", "Анталяспор" футболчилари, шунингдек, "Серик Беледиеспор"нинг тўрт нафар футболчиси бор. Четлатилганлардан фақат бир нафари - легионер.
Туркия футбол федерацияси ФИФА билан қўшимча трансфер ойнаси бўйича музокараларни бошлади, чунки иккинчи ва учинчи дивизионда кўплаб клублар ўйинлар учун таркиб туза олмаяпти. Айни пайтда иккинчи ва учинчи лига ўйинлари вақтинча тўхтатилган.
Аввалроқ Туркияда 17 нафар ҳакам ва икки нафар футбол клуби президенти ҳибсга олинган, шунингдек, 149 нафар ҳакам ставка учун четлатилган эди.
