"Барселона" бош мураббийи Ханс-Дитер Флик ҳужумчи Маркус Рэшфорд Чемпионлар Лигаси умумий босқичининг сафар ўйинида "Челси" билан ўйнаши мумкинлигини айтди.

"Мен жуда мамнунман. У шамоллашдан кейин қайтди, лекин энди унинг аҳволи яхши. Эртага унинг бошланғич таркибда тушиши ёки захирадан майдонга тушишини ҳал қиламиз. Аммо унинг "Барселона"да ўйнаётганидан хурсандман. Мен уни кузатдим. Ўтган сафар "Ньюкасл" билан ўйин олдидан ҳам шундай деганман - унинг бутун фаолиятини кузатиб борганман. Унинг ўйин сифатига қойил қолдим: жарима майдони ичида, дарвоза олдидаги ҳаракатлари. "Барселона"да ҳам у буни кўрсатмоқда.

Бу ўзгариш - Барселонадаги бошқа маданиятдаги ҳаёт, ажойиб об-ҳаво, одамлар - мен учун бу жуда ёқимли. Ҳозир у кўп жилмаяди. Агар у биздаги муҳитдан завқлана олса, бу унинг учун ҳам жуда яхши," - деди Флик матбуот анжуманида.

28 ёшли англиялик Рэшфорд 2025/26 йилги мавсумда Испания жамоаси сафида барча мусобақаларда 16 та ўйинда майдонга тушиб, 6 та гол урди ва 9 та голли узатмани амалга оширди.