"Барселона" марказий ҳимоячиси Рональд Араухо Чемпионлар лигасининг 5-турида "Челси"га қарши кечган ва 0:3 ҳисобидаги қақшатқич мағлубият билан якунланган ўйинда антиқаҳрамонга айланди.
Уругвайлик футболчи сешанба куни Лондонда бўлиб ўтган учрашувнинг 44-дақиқасида иккинчи сариқ карточкасини олди ва майдондан четлатилди. Бир киши кам бўлиб қолган баҳсда "кўк-анорранглилар" яна иккита гол ўтказиб юборди.
CatalunyaRadio хабарига кўра, орадан бир неча кун ўтган бўлса-да, Араухо содир бўлган воқеадан ҳайратда ва ўзини тушкун ҳис қилмоқда. Футболчи аввал ҳам шундай вазиятга тушиб қолган ва шу сабабли мухлисларнинг қаттиқ танқидига учраган. "Челси" билан ўйиндаги ҳаракатлар марказий ҳимоячига нисбатан умумий норозиликнинг янги тўлқинини келтириб чиқарди.
Шанба куни Ханс-Дитер Флик жамоаси ўз майдонида Ла Лига доирасида "Алавес"га қарши баҳс олиб боради.
