"Barselona" markaziy himoyachisi Ronald Arauxo Chempionlar ligasining 5-turida "Chelsi"ga qarshi kechgan va 0:3 hisobidagi qaqshatqich mag‘lubiyat bilan yakunlangan o‘yinda antiqahramonga aylandi.
Urugvaylik futbolchi seshanba kuni Londonda bo‘lib o‘tgan uchrashuvning 44-daqiqasida ikkinchi sariq kartochkasini oldi va maydondan chetlatildi. Bir kishi kam bo‘lib qolgan bahsda "ko‘k-anorranglilar" yana ikkita gol o‘tkazib yubordi.
CatalunyaRadio xabariga ko‘ra, oradan bir necha kun o‘tgan bo‘lsa-da, Arauxo sodir bo‘lgan voqeadan hayratda va o‘zini tushkun his qilmoqda. Futbolchi avval ham shunday vaziyatga tushib qolgan va shu sababli muxlislarning qattiq tanqidiga uchragan. "Chelsi" bilan o‘yindagi harakatlar markaziy himoyachiga nisbatan umumiy norozilikning yangi to‘lqinini keltirib chiqardi.
Shanba kuni Xans-Diter Flik jamoasi o‘z maydonida La Liga doirasida "Alaves"ga qarshi bahs olib boradi.
