"Манчестер Юнайтед" ҳужумчиси Матеус Кунья бошидан олган жароҳатидан сўнг сафга қайтишга яқин турибди.
26 ёшли футболчи "Эвертон"га қарши ўйиндан олдинги машғулотларда бошидан жароҳат олган. Муаммо дастлаб тахмин қилинганидан кўра жиддийроқ бўлиб чиқди ва бразилиялик "ирислар" билан ўйнамади. Ҳужумчига эҳтиёт чораси сифатида қўшимча дам берилди. Журналист Бен Жейкобснинг маълум қилишича, агар ҳаммаси кўнгилдагидек кетса, футболчида "Кристал Пэлас"га қарши ўйинда майдонга қайтиш учун барча имкониятлар бор.
"Қизил иблислар"нинг "бургутлар" билан сафар учрашуви якшанба куни Англия Премьер-лигасининг 13-тури доирасида бўлиб ўтади.
