"Рома"нинг "Брайтон"дан ижарага олган ҳужумчиси Эван Фергюсон тез орада Англияга қайтиши мумкин.
Римликлар ирландиялик футболчини ўтган ёзда ижарага олганди, бироқ футболчи ишончни оқлай олмади ва асосий таркибдаги ўрнини йўқотди. Calciomercato нашрининг хабар беришича, "Рома" январда Фергюсоннинг ижара шартномасини муддатидан олдин бекор қилиш ва унинг ўрнига бошқа ҳужумчи олиш ҳақида ўйламоқда. 21 ёшли футболчи билан хайрлашиш қишки трансферлар ойнасида таркибни кучайтириш учун маблағ ажратади.
Эван Фергюсон Жан Пьеро Гасперини жамоаси учун 12 та ўйинда битта гол ва битта голли узатмани ўз ҳисобига ёздириб қўйди. Ижара мавсум охиригача мўлжалланган ва сотиб олиш опциясини ўз ичига олади.
Маълумот ўрнида. Айнан Фергюсон "бўрилар" сафида ҳамюртимиз Элдор Шомуродов ўрнига олиб келинган эди.
