"Барселона"нинг 9 нафар каталониялик футболчиси "Алавес"га (3:1) қарши ўйинни асосий таркибда бошлади - бу 66 йил ичида Испания чемпионатида илк бор рўй берди.
29 ноябрь куни "Барса" ўзининг 126 йиллигини нишонлади. Шу куни Ханс-Дитер Флик тўққиз нафар каталониялик: Жоан Гарсия, Алекс Бальде, Пау Кубарси, Жерар Мартин, Эрик Гарсия, Марк Касадо, Марк Берналь, Дани Ольмо ва Ламин Ямални майдонга туширди. Улардан 7 нафари, Жоан Гарсия ва Жерар Мартиндан ташқари, клубнинг ёшлар академиясида таҳсил олган.
RAC1 журналисти Ориол Ховенинг таъкидлашича, бу 1959 йилдан бери биринчи марта "Барса"нинг асосий таркибида тўққиз нафар каталониялик футболчи чемпионат ўйинида майдонга тушган. Унинг қўшимча қилишича, бундай мисолни 1937 йилда, Испаниядаги фуқаролар уруши пайтида Каталония чемпионатининг "Эспаньол"га қарши ўйинида ҳам кўриш мумкин.
Аввалроқ, "Атлетик"ка қарши ўйинда (4:0) Флик каталонияликларнинг 9 нафар футболчисини майдонга туширганди. Фарқ шундаки, "Алавес"га қарши ўйинда тўққизтаси ҳам асосий таркибда майдонга тушди.
