"Ницца" ҳужумчилари Жереми Бога ва Терем Моффи мухлислар ҳужумидан кейин клуб сафида тўп тепишни истамаяпти, деб хабар беради RMC Sport.

30 ноябрь куни Франция чемпионатининг 14-туридан ўрин олган "Лорьян"га (1:3) қарши ўйиндан сўнг жамоанинг машғулот базаси ёнида олти ўйиндан иборат мағлубиятлар сериясидан норози бўлган 400 га яқин мухлис футболчилар билан суҳбатлашиш учун йиғилди. Улар жамоа бош мураббийи Франк Эзни истеъфога чиқаришга чақирувчи шиорларни айта бошлашди. Бир нечта мухлислар Моффи ва Богага ҳужум қилишди. Мухлислар футболчиларни уриб, уларга тупуришди.

2 декабрь куни иккала футболчи ҳам тиббий кўрикдан ўтказилди. Бога беш кунга сафдан чиқди, Моффи эса ҳафта охиригача касаллик таътилига чиқди.

"Ницца" барча турнирларда кетма-кет олтита мағлубиятга учради. Франция чемпионатида клуб 14 турдан сўнг 17 очко жамғариб, 10-ўринни эгаллаб турибди.