"Милан" спорт директори Игли Таре 30 ёшли дарвозабон Майк Меньян "россонерилар" билан янги шартнома бўйича 8 млн евро маош талаб қилаётгани ҳақидаги маълумотга изоҳ берди. Футболчининг Италия клуби билан амалдаги меҳнат шартномаси 2026 йилнинг ёзигача мўлжалланган.
"Мен Майкдан ҳеч қачон 8 миллион евро маош сўраганини эшитмаганман. У етакчи, ажойиб инсон. Меньян "Милан"да бахтли, у қолса хурсанд бўлардик. Биз фаол музокаралар олиб бормоқдамиз," - дея Таренинг сўзларини келтиради журналист Фабрицио Романо.
Меньян 2021 йилнинг ёзидан бери "Милан"да ўйнамоқда. Жорий мавсумда дарвозабон барча турнирларда 16 та ўйинда майдонга тушиб, уларнинг 8 тасида дарвозаси дахлсизлигини сақлаб қолди. Transfermarkt порталида келтирилган маълумотларга кўра, футболчининг бозор нархи 25 млн еврони ташкил этади.
