Лондоннинг "Арсенал" клуби собиқ футболчиси Аарон Ремзи жамоа ҳужумчиси Виктор Дьёкерешнинг жорий мавсумдаги ўйинларига баҳо берди.
"Канонирлар" ҳужумчини ўтган ёзда Лиссабоннинг "Спортинг" клубидан 65 млн евродан кўпроққа сотиб олган эди. Юлдуз янги футболчи ҳозирча сермаҳсуллик билан ажралиб тургани йўқ - 19 ўйинда олтита гол.
"Виктор кўпроқ нарсага қодир деб ўйлайман. Унинг очилишлари, тўпсиз ҳаракатлари мени ҳайратда қолдирди. Унинг иш этикаси жуда ажойиб. Менимча, у ўз ҳаракатлари билан ҳужумга катта ёрдам беради. Вақт ўтиши билан голлар келади. Ишончим комилки, Дьёкереш "Арсенал"да кўплаб муваффақиятли мавсумларни ўтказади. Унинг бу ҳаракатларни давом эттириши жуда муҳим", - дея Рэмзининг сўзларини келтиради инглиз ОАВ.
20 декабрь, шанба куни Микель Артета жамоаси "Эвертон" меҳмони бўлади.
