Матбуот анжуманининг иккинчи қисмида иштирок этган Мурод Исмоилов ҳакамлик борасида изоҳ бериб ўтирмади ва уларни хатоси бўлса Аллоҳнинг ўзи жазо беришини сўради.

— Авваламбор мана шундай об-ҳаво шароитида майдонда тўп сурган иккала жамоага ҳам миннатдорчилик билдиришни истадим. Ҳатто ташқарида кузатган томошабин учун ҳам иссиқлик қиладиган ҳавода улар тўп тепишди.

«Ўйинда иккала таймда ҳам бизда имкониятлар пайдо бўлди. Бироқ киритган голимизни ҳакам ҳисобга олгани йўқ. Танаффусдан кейинги биринчи учрашув бўлгани учун бироз секинроқ ўйин бўлганини таъкидлаш керак. Шу маънода бу ўйиндаги ҳолатларни ижобий баҳолаш мумкин».

— Боян Миладиновичнинг олдинги ҳолатини кўрмаяпмиз. Бугун ҳам олдинги учрашувларда унинг яккакурашларда имкониятларни бой берди.
— Ўша Боянни биз ҳам қидирмоқдамиз. Биринчидан унинг икки йиллик жароҳатидан кейин олдинги даражага чиқиб олиши қийин бўлади. Унинг ёши олдингидек эмас. Лекин биз унга олдинги мавқеини тиклаб олиши учун шароит яратиб бермоқдамиз.

— Ҳакамликка эътирозлар кўп бўлди. Сиз бу борада нима дея оласиз?
— Ҳакамлик жуда нозик масала. Келинг кимнингдир гуноҳи бўлса, худо жазосини берсин...

— Ўйин вақтини кечроққа суриш имконияти бор эди. Бунга ҳаракат қилинмадими?
— Бу бир-икки кун олдин ҳал бўладиган иш эмас. Биз ўйин вақтини келишган пайтимизда 19:00 қулайдек кўринганди.