"Манчестер Юнайтед", "Челси", "Вест Хэм" ва "Тоттенхэм" клублари "Ланс"нинг 23 ёшли яримҳимоячиси Мамаду Сангарени кузатиб бормоқда, деб хабар беради ТЕАМталк.
Манбага кўра, юқоридаги клублар Сангаре Мали терма жамоаси сафида иштирок этиши керак бўлган Африка Миллатлар кубоги якунлангач, футболчига қизиқиш билдиришини расман эълон қилиши мумкин. Мазкур турнир 21 декабрдан 18 январгача бўлиб ўтади.
Жорий мавсумда Сангаре барча мусобақаларда 21та ўйинда майдонга тушиб, 1та гол ва 1та ассистни ўз ҳисобига ёздириб қўйди. Футболчининг клуб билан амалдаги меҳнат шартномаси 2030 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 15 млн еврони ташкил этади.
