Мадриднинг "Реал" клуби "Манчестер Сити"нинг ўзбекистонлик ҳимоячиси Абдуқодир Ҳусановни ижарага олиш имкониятини кўриб чиқмоқда.

Fichajes нашри тарқатган хабарга кўра, мадридликлар учун устувор вазифа молиявий мувозанатни бузмаган ҳолда ва келажакдаги стратегик операцияларга тўсқинлик қилмаган ҳолда мудофаани кучайтириш ҳисобланади.

Шу боис, Мадридда Ҳусановни ижарага олиш масаласи жиддий ўрганилмоқда. Ўз навбатида, Манчестерда футболчига ишонч билдирилмаяпти ва музокараларга тайёр.

Қайд этилишича, Ҳусанов "қироллик клуби"нинг кўплаб талабларига жавоб беради: ёшлик, салоҳият, паст хавф ва яхши мослашувчанлик.

Бундан ташқари, ўзбекистонлик футболчининг трансфери "Реал"га брендни ривожлантириш учун стратегик аҳамиятга эга бўлган Осиё бозоридаги мавқеини мустаҳкамлаш имконини беради.

Жорий мавсумда 21 ёшли Ўзбекистон миллий жамоаси ҳимоячиси "Сити" сафида барча мусобақаларда тўққизта ўйинда майдонга тушди.