«Ан-Наср» клуби ва Португалия терма жамоаси ҳужумчиси Криштиану Роналду 28 декабрь куни Дубайда (БАА) бўлиб ўтган "Globe Soccer Award"да "Йилнинг энг яхши спортчиси" совринини қўлга киритганидан сўнг, ўз карьерасидаги режалари ҳақида гапирди.

"Шунча спортчилар билан бундай гала-кечада бўлиш мен учун катта завқ бағишлайди. Бу менинг севимли тадбирларимдан бири, чунки бу ерда мен ақл бовар қилмайдиган одамларни, жумладан, рафиқамни кўриб турибман.

Ўйинни давом эттириш оғир, лекин менда ҳали ҳам иштиёқ бор ва давом этишга мотивациям бор. Яқин Шарқда ўйнайманми ёки Европада — бундан кейин ҳам совринлар ютиб, ҳамма биладиган маррани забт этишни истайман. Жароҳатларсиз бўлса, унга етиб боришимга ишончим комил. Оқшомдан ва Янги йилдан завқланинг," — дея Роналдунинг сўзларини келтиради Goal.

Аввалроқ, Роналду фаолияти давомида 1000 та гол уришни истаётгани ҳақида хабарлар тарқалган эди. Ҳозирда унинг ҳисобида 956 та гол бор.