"Бухоро" жамоаси иккинчи давра ўйинлари бошланиши олдидан янги футболчилар билан шартнома имзолай бошлади.

Иккинчи даврага тайёргарлик кўриш мақсадида жамоа Тошкентда йиғин ташкил этди. Йиғинда эски футболчилардан ташқари бир нечта янги футболчилар қатнашишди.

Самарқанднинг "Динамо" футболчиси Владимир Киликевич, "Бунёдкор" жамоасининг бир йўла икки футболчилари — ҳужумчи Баҳодир Пардаев ва ўнг қанот ҳимоячиси Абдуқаҳҳор Ҳожиакбаров, "Гулистон" ҳимоячиси Бобур Акбаров, "Қизилқум" ҳимоячиси Илья Ильин ва легионер футболчи, 1989 йилда туғилган, бўйи 193 см бўлган белоруслик ҳимоячи, Белорусь олимпия терма жамоаси аъзоси, Лондонда бўлиб ўтган ёзги олимпиада қатнашчиси Юрий Ришко "Бухоро" жамоасида кўрикда булишди.

"Гулистон" ҳимоячиси Акбаров бир учрашувда майдонга тушиб, мураббийлар ишончини оқламади ва натижада унга жовоб берилди.

Бир катор футболчилар билан кеча шартнома имзоланди. Қуйидаги футболчилар бугундан бошлаб расман "Бухоро" футболчилари саналишади:
Баҳодир Пардаев - ҳужумчи ("Бунёдкор")
Абдуқаҳҳор Ҳожиакбаров - ўнг қанот ҳимоячиси ("Бунёдкор")
Илья Ильин - ҳужумкор ярим ҳимоячи ("Қизилқум")
Юрий Ришко - марказий ҳимоячи (Белорусь)

Владимир Киликевич масаласи ҳамон очиқлигича турибди. ПФЛга заявкалар 10 августга қадар топширилишини инобатга оладиган бўлсак, бу масалага ҳам яқин кунлар ичида ойдинлик киритилади.