«Реал» ва Германия терма жамоаси ҳимоячиси Антонио Рюдигер ўзининг тарихий ватани — Сьерра-Леонега ташриф буюрди.

Рождество байрами муносабати билан юзага келган таътил пайтида футболчи бир ҳафтага Сьерра-Леонега — онасининг ватанига хайрия мақсадида келди. Мамлакатда бўлган вақтда Рюдигер Фритаунда имконияти чекланган инсонлар учун эҳсон дастурхонини ёзди. Ушбу тадбирда 200 нафардан ортиқ киши иштирок этди, унда иссиқ овқат ва биринчи эҳтиёж буюмлари тарқатилди.

«Мен мусулмон бўлишим мумкин, лекин мен учун бу дин масаласи эмас, инсонийлик масаласи. Рождество — муҳаббат, меҳр-шафқат ва саховат вақти. Ҳеч ким ўзини четга сурилган ёки унутилган деб ҳис қилмаслиги керак. Қийинчиликда яшаётган инсонлар билан бир дастурхон атрофида ўтириш мен учун жуда катта аҳамиятга эга. Кўплаб одамлар ўзини ташлаб қўйилгандек ҳис қилади. Мен уларни кўриб туришларини, уларнинг аҳамиятли эканини билишларини истадим», — деди «Реал» ҳимоячиси.

Пойтахтда Рюдигер параспортчилар ҳамда имконияти чекланганлар ҳуқуқларини ҳимоя қилувчи фаоллар билан учрашди. Шунингдек, у Германиянинг Сьерра-Леонедаги элчиси Паскаль Рихтерга ўз жамғармасининг маҳаллий ҳокимиятлар билан, хусусан, таълим муассасаларини қўллаб-қувватлаш йўналишида ҳамкорлик қилиш имкониятларини ўрганишни таклиф қилди.

Шунингдек, футболчи мамлакатнинг шарқий қисмида жойлашган Коно округига ташриф буюрди. Рюдигер жамғармаси Under Armour билан ҳамкорликда маҳаллий академиялар ва қуйи лигаларда тўп сураётган 350 нафардан ортиқ ёш футболчини қўллаб-қувватлади — уларга спорт формаси, янги тўплар ва машқ анжомлари тақдим этилди. Бундан ташқари, жамғарма маҳаллий давлат шифохонаси учун катта миқдорда дори-дармон кўринишида хайрия қилди. Коно округидаги тадбирлардан бири чоғида ҳимоячи хавф гуруҳидаги болалар, асосан қизлар билан учрашиб, уларнинг таълим олишига ёрдам беришини, ўқиш учун барча зарур шароитларни таъминлашга ваъда берди.

Қайд этилишича, Рюдигер Сьерра-Леонега хайрия ташрифи билан учинчи бор келмоқда.