ОКМК профессионал футбол клуби Осиё чемпиони билан шартнома имзолади. Қишки трансфер ойнаси доирасида олмалиқликлар Ўзбекистон ёшлар ва олимпия терма жамоалари аъзоси, 2023 йилги U-20 Осиё кубоги чемпиони бўлган 22 ёшли марказий ярим ҳимоячи Беҳруз Асқаровни ўз сафига қўшиб олишди.

Беҳруз Асқаров профессионал фаолияти давомида Тошкентнинг «Пахтакор» ҳамда Қозоғистоннинг «Турон» клублари сафида тўп суриб, турли чемпионат ва халқаро мусобақаларда муҳим тажриба тўплаган. Марказий ярим ҳимоячи сифатида у майдон марказида ишончли ва барқарор ҳаракатлари, ўйинни ташкил этишдаги фаоллиги, шунингдек, ҳужум ва ҳимоя ўртасидаги мувозанатни самарали таъминлай олиши билан ажралиб туради. Шу кунга қадар футболчи клуб миқёсида 55 та учрашувда майдонга тушиб, 2 та гол ҳамда 3 та голли узатма муаллифига айланган.

Шунингдек, футболчи Ўзбекистон U-19 (6 та ўйин), U-20 (16 та ўйин) ва U-23 (12 та ўйин) терма жамоалари сафида муносиб иштирок этиб, барқарор ва ишончли ўйини билан мутахассислар ҳамда мухлислар эътиборини қозонган. Беҳруз Асқаров 2023 йилда ўтказилган U-20 Осиё кубогида терма жамоамиз таркибида чемпионликни қўлга киритган. Янги мавсумдан бошлаб олмалиқликлар шарафини ҳимоя қиладиган истеъдодли футболчи Беҳруз Асқаров билан ОКМК ФК ўртасида бир йиллик шартнома имзоланди.